Zer da eusGara?
Arratian, euskara komunitatearen ardatza da: kalean, familian, eskolan eta enpresetan. Arratia eta euskara eskutik doaz, eta arlo sozioekonomikoa giltzarria da gure hizkuntzaren etorkizunerako. Euskararen presentzia indartzeak hizkuntza sustatzeaz gain, eskualdeari nortasuna ematen dio, balio erantsia sortzen du eta bertako enpresen errotzea zein garapena bultzatzen ditu.
eusGara proiektuak 2017tik sustatzen du euskararen erabilera Arratiako lan-munduan. Egun, enpresetan, adinekoen hiru egoitzatan eta Zulaibar Lanbide Ikastegian garatzen da, zerbitzuak eta prestakuntza euskaraz egiteko aukerak handituz.
Entitate bakoitzaren beharretara egokitutako laguntza eta hizkuntza-kudeaketa eskaintzen ditu, AHIZE-AEKren aholkularitzarekin. Proiektuak Eusko Jaurlaritza, Bizkaiko Foru Aldundia eta Arratiako udalen babesa jasotzen du.
Metodologia arina, erraza eta eraginkorra da: hasierako diagnostiko labur baten bidez, enpresari egokitutako ibilbidea proposatzen zaio, eta bidean laguntza teknikoa jasotzen du, eskualdeko lan- eta euskararen ekosistema sendotuz.
Helburuak
Zerbitzuak
Hitzarmenkideak
eusGara ekitaldiak
eusGara 2025
eusGara komunitateak indarberrituta ekin dio 2025ari, Arratiako eta Durangaldeko lan-munduan euskararen presentzia indartzeko, erakunde eta enpresen arteko elkarlan zabalari esker.
Aurten, bereziki zaintza-erakundeen eta Lanbide Heziketako ikastegien arteko elkarlana nabarmendu da.
Euskarazko praktikaldiak sustatzeko egitasmoek eta zaintza arloko hizkuntza-gaitasuna indartzeko garatutako tresnek emaitza esanguratsuak eman dituzte eta aldi berean, sareak hazten jarraitzen du, hitzarmenkide berrien konpromisoari esker.
eusGara 2024
eusGara komunitateak urrats sendoa eman du Arratiako lan-munduan euskararen presentzia indartzeko.
Gaur egun, 33 enpresak osatzen dute sarea, eta aurten beste lau batu dira ekimenera.
Ekitaldian, enpresek eta egoitzek euren praktika onak eta esperientziak partekatu dituzte.
Aurten bereziki nabarmendu da zaintza-erakundeen arteko elkarlana: hiru egoitzak elkarlanean aritu dira hiztegi afektibo baten lanketan, eta egindako lanak emaitza oso esanguratsuak utzi ditu.